Otis reorganiza a súa actividade para Europa en tres áreas (Xullo 2004)
O presidente de Otis Elevator, Ari Bousbib, anunciou o 19 de xullo por intranet que reorganizará Otis en tres áreas para Europa.
Segundo as informacións da compañía estadounidense, con estes cambios revitalizarase e mellorarase o mercado, amais de asegurarse a continuidade do crecemento das compañías en Europa. Terá carácter efectivo desde o mes de agosto.
Unha vez máis e como vén sendo habitual, Otis non respecta os acordos de información e consulta para os traballadores europeos, e comunica as súas decisións por intranet cando xa están tomadas, obviando as canles que as directivas europeas impoñen a todas as empresas destas características.
Esta falta de comportamento responsable e correcto fixo que o comité de empresa europeo Otis, a través do seu subcomité reducido, xa realizara unha reclamación e protesta á dirección europea de Otis, por este tipo de pautas tan negativas para o diálogo social. Esta nova reorganización queda deste xeito:
Área Norte e Este de Europa (NEEA) Francia, Suíza, Benelux (Bélxica, Holanda e Luxemburgo), Rexión Nórdica (Dinamarca, Finlandia), Estados Bálticos (Letonia, Lituania, Estonia, Noruega e Suecia), Marrocos, Rusia, Ucraína, Kazajstán e Acerbaixán. O presidente será Bruno Grob.
Área Sur Europea e Medio Este (SEMA) España, Portugal, Italia, Grecia, Chipre, grupo Medio Este (Exipto, Kuwait, Líbano, Arabia Saudita, Emiratos Árabes, Turquía). O presidente será Mario Abajo.
Área Centro Europa (UCEA) Reino Unido, Irlanda, Alemaña, grupo Centro Europa (República Checa, Hungría, Polonia, Croacia, Romanía, Eslovaquia, Eslovenia, Austria). O presidente será Didier Michaud como novo nomeamento.
De primeiras, e sen termos coñecemento da información oficial, podemos pensar que estes cambios se deben máis a estratexias internas de influencia nos mercados da compañía que a intereses claros da ampliación económica europea. Da anterior organización, a máis prexudicada parece ser Alemaña, que pasa de ser un país dominante nas áreas de influencia de Europa Central a ser un país da área controlada desde o Reino Unido, que é, sen dúbida, o país máis beneficiado de todos estes movementos. España perde a influencia sobre o Reino Unido e mantén os demais países do seu mercado.
|
Sevilla.- Xulgan dous ascensoristas pola caída dun aparello con dúas persoas dentro nas Tres Mil Vivendas SEVILLA, 15 (EUROPA PRESS)
Un Xulgado do Penal de Sevilla deixou visto para sentenza un xuízo contra dous ascensoristas acusados de imprudencia profesional ao non actuaren sobre un elevador en mal estado que finalmente caeu ao baleiro con dúas persoas dentro.
O ascensor ceibouse o 12 de abril de 2003 nun edificio de oito plantas da rúa Escultor Sebastián Santos, na barriada das Tres Mil Vivendas, logo de varios veciños teren denunciado varias veces as súas condicións ante o temor dun suceso deste tipo, pero só conseguiran algunhas inspeccións pero non a súa substitución.
Fontes xudiciais indicaron a Europa Press que o avogado que se está a encargar da acusación privada visitara o edificio dous días antes de ocorreren os feitos e que mesmo lera un informe realizado por un técnico, pero os ascensoristas que inspeccionaron o aparello non creron conveniente cambialo a pesar de teren apreciado o rozamento dos ferros e uns ruídos fóra do normal.
Aquel día, o ascensor finalmente caeu cando un mozo duns 23 anos e mais outra persoa de máis de 50 anos estaban no seu interior indo do primeiro ao cuarto andar. En subindo polo segundo, comezou a descender e sentiuse un estrondo forte provocado ao venceren os sistemas de acuñar.
Ambas as persoas sufriron erosións de carácter leve; o home máis vello bateu entón contra algo cando trataba de saír do ascensor axudado polo mozo —compañeiro da súa filla—, tras un outro movemento brusco do elevador, sobre o que caeron varias vigas de formigón, afortunadamente, de maneira cruzada.
Aínda que en principio o Xulgado de Instrución arquivou o caso, a Audiencia acordou a apertura de dilixencias previas e un Xulgado do Penal xa viu a causa, que está á espera de sentenza. No xuízo declararon, amais dos dous acusados, a presidenta da comunidade de propietarios, algunhas testemuñas, veciños e prexudicados, que reclaman unha indemnización duns 1.800 euros.
A acusación mantén a forma incorrecta de actuar de ascensoristas e empresa polo que consideran falta de mantemento na zona e de revisións exhaustivas, o que provocaron un accidente que non causou graves consecuencias.
As devanditas fontes apuntaron que os acusados recomendaran o engraxamento do elevador e informaran de que os ruídos non tiñan especial importancia; por iso se viron tamén sorprendidos por este suceso, por causa do cal se enfrontan ademais a unha inhabilitación dun ano.
|
COMUNICADO
Madrid, 15 de marzo de 2004
Ante o terrible atentado terrorista perpetrado o pasado 11 de marzo, queremos amosar a nosa solidariedade coas numerosas vítimas, e especialmente coa familia do noso compañeiro José María García Sánchez, traballador da delegación de zona de Madrid.
Queremos lembrar a José María como o que foi, un loitador polas liberdades nos peores momentos da nosa historia, un defensor dos dereitos dos traballadores para mellorar a nosa sociedade.
Desde a sección sindical de CC.OO de Zardoya Otis condenamos este brutal atentado.
Finalmente, queremos agradecer as mostras de solidariedade que recibimos, coa certeza de que estas condolencias han ser transmitidas á súa familia e amizades.
Sección Sindical de Comisións Obreiras de Zardoya Otis.
|
Madrid 26/feb/2004
á/a Sr. Presidente Otis Elevador (Sr. Ari
Bousbib)
C/C Sr. Mario Abajo (SEA), conselleiro delegado Zardoya Otis S.A.;
Sr. Pedro Sainz de Baranda, director xeral Zardoya Otis.
Desde a súa última visita
á fábrica de Madrid, o 5 de novembro de 2002, seguimos
agardando que a empresa tome unha decisión sobre a compra de
terreos e o posible traslado das instalacións.
A dirección española infórmanos de que están
á espera das súas decisións, e que a súa
previsión é que nós teñamos un CLC (contract
logistics center), onde se fabricarán uns compoñentes,
embalaxes e loxística de produtos.
A nosa opinión é que, se isto acontece, a carga de traballo
e mais a actividade industrial da factoría diminuirán,
e como consecuencia, pode significar unha perda de postos de traballo.
Queremos facerlle chegar a nosa preocupación permanente pola
falta de claridade e información sobre o futuro da fábrica
e os nosos postos de traballo.
Por favor, respondan:
Cando pensan contestar as nosas preguntas?
Cando pensan autorizar a compra de terreos para trasladar a factoría?
Cando se producirá esta operación?
Esperamos as súas noticias. Saúdos cordiais desde Madrid.
(Comité de empresa da fábrica Madrid)
|
Venda
ilegal da fábrica de OTIS en Bombay ( 12/01/04)
Na
India houbera un pouco de desenvolvemento ultimamente. Pero o 30 de
decembro de 2003, preto de douscentos obreiros foron sorprendidos cun
aviso nas reixas de fábrica de OTIS en Bombay de que a fábrica
fora vendida a algunha compañía local chamada UNITED WHITE
METAL LIMITED (a existencia desta empresa é un interrogante para
nós). Aos obreiros déronlles a opción de aceptaren
o novo patrón ou seren recolocados.
A compañía leva varios anos tentando librarse dos obreiros
da fábrica de Bombay con moitas dificultades, dándolles
algún incentivo para que estes optasen polas xubilacións
anticipadas —a maioría das veces, intimidándoos
para aceptaren a xubilación anticipada—. Pensamos que xa
poderían ter reducido o cadro de persoal de 950 obreiros —que
eran en 1992— ata os douscentos, en 2002 , mediante estas tácticas.
Entre mentres, a empresa construíu unha nova fábrica en
Bangalore, tamén na India, que non ten ningunha forza sindical.
Os sindicatos de Bombay están buscando as accións legais
necesarias contra OTIS (a opinión legal neste caso de transferencia
da fábrica de OTIS é a de ser un incumprimento claro da
lei). Pero como o sistema legal na India móvese moi de vagar,
e case nunca se dá cumprido o que decide, calquera tregua neste
asunto levaría o seu tempo. Tamén se están a preparar
outras accións de protesta. Harish Pujari > (Representante
Sindical de Otis India).
|
Otis
adquire a compañía de ascensores Amtech (1 septembro 2003)
Na terceira semana de agosto chegáronnos
algunhas informacións de Otis EUA. Velaquí a información
que transmitiu a compañía en España.
Otis amplía o seu mercado nos Estados Unidos
Otis Elevator Company completou satisfactoriamente a compra de Amtech
Elevator Services, o que lle permite ampliar a súa carteira de
ascensores e escaleiras mecánicas en mantemento, reparación
e modernización nos Estados Unidos.
Amtech,
antiga filial do grupo industrial ABM, é unha das maiores contratistas
independentes de ascensores e escaleiras mecánicas nos Estados
Unidos, cunhas vendas que o ano pasado ascenderon a 113,9 millóns
de dólares e operacións en vinteún estados.
«Amtech
representa unha oportunidade excelente de crecemento para Otis»,
sinalou Ari Bousbib, presidente de Otis Elevator. «Queremos rendibilizar
a presencia de Amtech e a súa gran reputación nos principais
mercados do país para aumentar as posibilidades de negocio».
Con
sede en Anaheim, California, Amtech posúe oficinas rexionais
nas principais áreas metropolitanas. Na súa ampla carteira
de clientes atópanse universidades, aeroportos, hoteis, casinos,
centros de congresos, edificios de oficinas, hospitais, instalacións
industriais e complexos deportivos.
«Os
empregados de Otis levan traballando un século e medio para servir
os nosos clientes coa tecnoloxía máis avanzada e uns niveis
de calidade de primeira orde», engadiu Bousbib. «Estamos
desexando estender o noso compromiso de servicio e tecnoloxía
a estes novos mercados».
Otis
é o principal fabricante e mantedor de productos para o transporte
vertical de persoas, incluíndo ascensores, escaleiras mecánicas,
plataformas móbiles e lanzadeiras. O mes pasado, Otis conseguiu
o contrato para instalar trinta e dous ascensores no edificio 7 do World
Trade Center, o primeiro que se levantará como parte da reconstrucción
da ‘zona cero’ do baixo Manhattan. Así mesmo, Otis
conseguiu recentemente o contrato para instalar 111 ascensores e escaleiras
mecánicas nun centro comercial en Guangzhou, na China, o máis
grande de Asia.
|
(4
de agosto 2003) Ari Bousbib(30/07/03) , presidente de Otis, comunica
que para o 2 de setembro de 2003 anunciará cambios na organización
de enxeñería e operacións.
Todo
é debido, segundo informacións vindas desde EUA, á
decisión da UTC de que Olivier Robert, director de fabricación
mundial e vicepresidente de operacións e enxeñería,
dirixa a nova compañía Chubb, acadaba de mercar pola UTC
(Chubb é a sexta multinacional e opera nos países seguintes:
Australia, Bélxica, Canadá, China, Timor Oriental, Francia,
Alemaña, os Países Baixos, Hong Kong, Irlanda, Corea,
Macao, Nova Zelandia, Singapur, Africa do Sur, España, Taiwán,
Tailandia, Reino Unido e os Estados Unidos, cun total de 48.000 persoas
empregadas. Esta empresa tivo, tradicionalmente, dous productos: o seu
negocio principal, a seguridade e as alarmas de lume e tecnoloxía,
mailos servicios de vixilancia).
O
señor Bousbib —nun escrito co seu habitual ton paternalista—
deu unha breve explicación da súa traxectoria histórica
e dos magníficos logros conseguidos por el como directivo da
Otis durante case dúas décadas.
Desde o noso punto de vista non podemos ser imparciais. Lembremos que
as decisións deste directivo non teñen sido moi beneficiosas
para os asalariados de Otis, en especial en canto á producción
e á fábrica Madrid —o transvasamento da liña
de portas a Gien, a transferencia de tecnoloxía do ascensor sen
cuarto de máquinas Madrid 99 a Cernusco ou o último transvasamento
dos bastidores do Madrid 99 tamén para Italia— e sobre
todo, ás máis de 17 factorías pechadas no mundo
e que se lle poden atribuír ó seu mandato, e diso si que
podemos facer historia.
Evidentemente, desde o punto de vista do capital, a multinacional e
os accionistas poden ter resultado beneficiados abondo, xa que as reestructuracións
e a racionalización —o peche de fábricas—
das produccións en todo o mundo maila eliminación dos
custos —a subcontratación a provedores máis baratos—
incrementaron os dividendos da multinacional norteamericana; en resumo,
iso é o que interesa ó final do ano.
Pois parece que, desafortunadamente, xa sabemos o que lles espera ós
traballadores e traballadoras da Chubb co señor Robert, ¿non
vos parece?
Das informacións que nos transmite o noso benquerido presidente
M. R. Bousbib tírase que calquera cambio na organización
significa “ir para peor”. Algúns habémonos
librar, pero outros hanse ver prexudicados polas magníficas ideas
que toman a miles de quilómetros directivos de “Conectika”.
O día 2 de setembro saberemos algo máis, pero a nós
xa nos cheira; por iso, preocúpano-la situación da enxeñería
I+D de Madrid, asemade das restantes de Europa.
A paralización dos investimentos e a reestructuración
do persoal deste ano abrírono-los ollos: non ten intención
ningunha a multinacional de potencia-los centros de investigación
e desenvolvemento de Europa, non se traballa en nada novo e seguiremos
cos mesmos modelos de ascensores. Só contan reduci-los custos
actuais. Agora parece máis rendible investiren en países
asiáticos e trasladaren algunhas produccións, como as
escaleiras mundiais, de Alemaña para a China. >>> Continuaremos
informando.
|
Otis consegue
o contrato para o World Trade Center , Nova York fonte: Zardoya
Otis S.A. o
15 de xullo de 2003
A
empresa Otis conseguiu un contrato para instalar 32 ascensores no World
Trade Center, o primeiro edificio que será construído,
como parte do desenvolvemento da “zona cero” de Manhattan.
Otis fai parte do grupo United
Tehnologies Company (NYSE:UTX).
O novo edificio substituirá aqueloutro World Trade Center orixinal
que foi destruído o 11 de setembro de 2001 por ataques terroristas.
O proxecto baséase nunha torre de trinta mil millóns de
metros cadrados de espacio para oficinas. A torre incluirá 29
ascensores de pasaxeiros e tres servicios para coches. "Otis esta
orgullosa de estar entre as primeiras compañías que axuden
a reconstruí-lo centro da cidade de Manhattan", dixo Ari
Bousbib, presidente de Otis, "orgulloso unha vez máis de
participar nun proyecto conxunto cos que foran os primeiros clientes
da construcción”. Contan remata-lo proxecto contra finais
de 2005.
O edificio é propiedade de Silverstein Properties e os arrendamentos
exclusivos dos terreos pertencen á autoridade do porto; a Tishman
Corporation é a constructora xeral.
O edificio ocupará o bloque da cidade estremeiro coa rúa
Barclay, polo norte, coa rúa de Vesey polo sur, coa rúa
de Washington polo oeste e mais coa rúa Greenwich polo este.
Otis xa tivera o mantemento desta compañía no World Trade
Center no momento do derrubamento; tamén mantivera unha parte
da zona comercial en 1971, cando fora da instalación de 327 ascensores
e escaleiras mecánicas, amais do mantemento das instalacións
ata 1994.
"A
historia de Otis empezou na cidade de Nova York, onde Elisha Graves
Otis presentou as primeiras seguridades de freos e instalou os primeiros
ascensores para pasaxeiros do mundo. Desde entón, as persoas
de Otis teñen axudado a crea-la skyline de Nova York e mais doutras
grandes cidades do mundo". Desta volta, dixo Bousbib, "as
persoas de Otis están á espera de volver desempeñar
un papel importante nesta reconstrucción" histórica.
Otis
é unha compañía subsidiaria totalmente de UTC,
o fabricante máis grande do mundo, que ten as súas oficinas
centrais en Farmington, Connecticut, EUA, onde Otis ten empregadas máis
de 155.000 persoas, ofrece servicios e productos a máis de 200
países e leva o mantemento de máis de 1.35 millóns
de ascensores e escaleiras mecánicas no mundo enteiro.
|
E
volta e dálle - NOVA PERSECUCIÓN SINDICAL EN CÁDIZ
(05/07/03)
Non é a primeira vez que ocorre que a dirección de OTIS
empregue métodos policiais ou investigue con detectives os traballadores
que están de baixa laboral ou que están a traballar, por
ver se os pode despedir. Semella, desafortunadamente, que todos estamos
expostos a que a dirección de recursos humanos de Zardoya-Otis
nos espíe.
¿E quen di que nada máis nos investigan cando estamos
de baixa ou no traballo?, ¿quen di que non coñecen a nosa
intimidade? As liberdades individuais das persoas e vidas privadas,
¿que é iso para a dirección? ¿E non vai
ser que son uns enfermos, uns miróns? ¿Gústalles
investigar en nós, nos representantes e mais nos traballadores,
que consideran “conflictivos”?
Somos moitas persoas a traballarmos nesta empresa que non estamos de
acordo co xeito nin cos métodos que está a emprega-lo
departamento de recursos humanos para face-lo seu traballo. Haberá
que lles dar a eses directivos unha resposta “acorde coas súas
maneiras de traballar” xa que non respectan algunhas cuestións
ben envidentes nesta sociedade onde nos obrigan a vivir.
O compañeiro Antonio Pérez, membro do comité de
empresa da dirección de zona de Cádiz, tivo que denunciar
e redactar unha acta de instrucción perante a policía
de Sevilla por causa dos graves feitos acontecidos o día 2 de
xullo deste ano contra a súa persoa e maila súa familia.
Durante unha viaxe que facía de San Lucar a Sevilla, o compañeiro
decatouse de que un coche andaba a seguilo, polos estraños movementos
e as brusquidades que este realizaba. Temendo que se tratase dalgún
mal entendedido con el, deixou súa muller e súa sogra
no hospital Virgen del Rocío para que lles pasase mal ningún.
A seguír, foi ata o aparcadoiro do Corte Inglés e logo
á sede de CC.OO. da cidade, e o individuo alí o seguía.
Foi daquela cando contou o que lle estaba a suceder a uns compañeiros,
que saíron de contado á rúa xunta con el e repararon
que o fulano estaba nunha praza próxima.
Evidentemente, poñéndose no peor, e que lle podía
suceder algo grave, decidiron chamar á policía, que acudiu
ó local e, tras obrigar ó perseguidor a se identificar,
coñeceron que se trataba dun detective privado supostamente contratado
por Zardoya-Otis.
O compañeiro xa dispón dun avogado para defender esta
denuncia; a penas falta o procurador e para a semana vindeira o avogado
poñerá en marcha este tema tan desagradable e bochornoso
provocado directamente pola dirección de recursos humanos da
empresa.
Dános en pensar que o motivo do acontecido, que acabamos de relatar,
veña dado por un conflicto laboral vixente, xa que a dirección
non deu chegado a un acordo cos traballadores e, parece ser, que a convocatoria
de folga das gardas na provincia de Cádiz non lle acaeu ben de
todo á mente revirada dalgún directivo.
Debemos reprobar, como traballadores, como representantes dos traballadores
e, sobre todo, como persoas esta política e esta actitude da
dirección do persoal de recursos humanos de Zardoya-Otis S.A.,
por demostrar unha clara incompetencia e falta de profesionalidade por
resolve-los problemas e as relacións laborais da empresa. No
canto de procura-lo diálogo social e o equilibrio nas relacións
laborais, emprega métodos escuros para se desfacer dos representantes
dos traballadores que os amolan.
¡¡Compañeiros/as: ollo coa toupa, vixílanos!!
|
A
UTC compra , a sexta compañía de seguridade máis
grande do mundo (Chubb ) 23/06/03
A
UTC compra Chubb, multinacional que opera nos países seguintes:
Australia, Bélxica, Canadá, China, Timor Oriental, Francia,
Alemaña, Os Países Baixos, Hong Kong, Irlanda, Corea,
Macau, Nova Celandia, Singapur, África do Sur, España,
Taiwán, Thailandia, Reino Unido e os Estados Unidos, cun total
de 48.000 persoas empregadas.
Esta empresa tivo tradicionalmente dous productos: un é o seu
negocio principal —a seguridade e as alarmas de lume e tecnoloxía—;
o outro, os servicios de vixilancia.
A pregunta que inmediatamente se fan os técnicos financeiros
é se A UTC manterá esta empresa dentro do grupo ou, pola
contra, venderaa.
O
pasado mércores pola noite, o grupo industrial americano anunciou
que estaba de acordo na compra de Chubb por un billón de dólares.
Ofreceu 75 peniques (1,25 dólares) por acción, en diñeiro
en efectivo para Chubb, o que significa valora-la compañía
en 622 millóns de libras esterlinas.
UTC
tamén asumirá a débeda de Chubb, que ascendera
a 473 millóns de libras, a finais de decembro, e ata 566 millóns
a finais de abril. UTC asegurou que o trato sería superior ás
ganancias; e George David, o seu xefe executivo, afirmou que Chubb “encaixa
perfectamente na mestura de negocios de UTC e maila súa estratexia
de adquisicións”.
O señor Robert Horton, presidente de Chubb, dixo que o grupo
do Reino Unido tiña clara a estratexia e o potencial "a
longo prazo" desta empresa, e considera que ese potencial poderá
espallarse mellor e máis axiña dentro dun grupo máis
grande, como é UTC”.
Chubb,
a sexta empresa de seguridade máis grande do mundo, anunciara
hai case oito semanas que recibira unha oferta, pero unha semana despois
a empresa sorprendeu a todos con esta venda.
|
|
